SUBVENCIÓNS AO SECTOR CULTURAL

Unha das principais vías de apoio público ao sector cultural galego materialízase a través do programa anual de subvencións da Axencia Galega das Industrias Culturais, que ten como prioridade potenciar a creación, produción e distribución dos produtos culturais galegos e favorecer, en consecuencia, o desenvolvemento e consolidación dun tecido empresarial sólido canto ás súas estruturas de traballo e punteiro en creatividade e innovación.

As convocatorias de axudas da Agadic estrutúranse arredor de dous eixos principais:

-Subvencións ás industrias culturais

Publicadas a través dunha mesma convocatoria, constan de distintas modalidades destinadas a fomentar a actividade escénica profesional, facilitar e normalizar o acceso das empresas culturais ao financiamento bancario, impulsar a adaptación das empresas discográficas ao novo panorama dixital, ou promover a distribución exterior dos bens e servizos culturais, entre outros epígrafes.

-Subvencións ao sector audiovisual

Convócanse liñas de axuda para a produción ou coprodución de longametraxes, produción de curtametraxes e videoclips, desenvolvemento de proxectos, promoción do talento audiovisual galego, e desenvolvemento e produción de contidos interactivos.